“Hamkraini lamao bisikbrwi” VVM pandao Montri Okra Biplab Kumar Deb

 “Hamkraini lamao bisikbrwi” VVM pandao Montri Okra Biplab Kumar Deb Vivekananada Bichar Moncho-ni luajimungbai tei Majdoor Monitoring Cell ...

 “Hamkraini lamao bisikbrwi” VVM pandao Montri Okra Biplab Kumar Deb

Vivekananada Bichar Moncho-ni luajimungbai tei Majdoor Monitoring Cell -bai TGEA-ni chubachubai Bubagrakhorni Rabindra Sattabarshiki Bhawan-o khwlaijakha “hamkraini lamao bisikbrwi” kok bothomano twiwi koklam salaimung panda . Chasalo o pandano chati mwchwngwi chengwi rwkha Montri okra Biplab Kumar Deb . a salni pandao kok narwkna thangwi Montri okra Biplab Kumar Deb sakha, ang tamo khwlaikha khwlaiya abono sana nangya, phiya o kok thaisa kubuino Sanai mungsa-swk kwtal khwlaiwi phunukha , abono norog nugui mankha. Ang CPIMni tracking-o haphang-ni samung tangya . ang ani tracking-o samung tango je trackingno Modi swnamwi rwkha . a salo Montri okra kok narwkna thangwi pandao manjaknairokno sakha norog sebuk simi khwlai paikheno da wngjaknai norogni bwsa bwtwi-rokni bagwi sabo uansuknai.

O hasteo norogni bwsa bwtwi-rokni bagwi uansuknai haphang kebo tongkhe abo BJP haphang . norogni bwsa bwtwi-rokni kokno uansugwino hasteo tubujakha Bidhyajyoti tangbwtang. Hasteni khungra nwichiba CBSEbai naikoljak rwngnok Bidyajyoti tangbwtango khobjakha . norogni bwsa bwtwi-rokni kokno uansugwino tubujakha NCERTni syllabus. Norogni bwsa bwtwi-rokni bagwino haste BJP haphang bwskang 2047 bisi jora bisi nwichiba romwi bo lamao thangnai hasteni thinang abono tiyar khwlaiwi tonijakha . bo lamao thangkhe sebuk manai, bo lamao thangkhe nini bwsa-ni thinang chwngsanai aboni bagwi tiyar khwlaijak hwnwi sakha Montri okra Biplab Kumar Deb .

A salni pandao kok narwkna thangwi hasteni montri okra Biplab Kumar Deb haste haphangni bwkhaktwi bwrwi-rokni bagwi naharjak tang bwtangrokno hainohai muito khwlaiwi rwkha. Bo sakha, bwrwi-rokni hamkraini bagwi sakhwlaijakha 33% reservation. Abono karwibo bwrwi-rokno yapri kwrak khwlaina bagwi tei sebuk manmani ulo tongna chanani jwngjal mwthakthani working Hostel swnamjaknai hwnwi sakha Montri okra Biplab Kumar Deb.

A salni pandao montri okrano karwibo manjaklaikha Pradesh BJPni achukphang yakchu Rajib Battacharjee, AMCni Mayor Dipak Majumder-no khobwi mothani kwbangma sebuk khwlainairok manjaklaikha . Vivekananda bichar moncho-ni bwkhaktwi abohai samung bwtang bwskangni salobo tongnai hwnwi suai mankha koktwma . mothani samungno bolaikha pandao manjaknai nograi-rok .