Press Sticker Misuse wngmani Mwthaknani bagwi Kwrak Saktharmung Nahariaknani Sanmung Tisakha Khumulwng Press Club

13th July, 2026: Press Sticker Misuse wngmani Mwthaknani bagwi, Kwrak Saktharmung Naharjaknani Sanmung Tisakha, Haste Haphang bai Gosimung Manjak Tiprasrokni Kaisa Suchuruk Press Club- Khumulwng Press Club.

Abo haikheno Media House ni Mung Naharwi Dalbidal Bijra Baniya Khlaijagwi Tongmani Mwthaknani tei Media House ni ID Card bai Drug Smuggling Khlaijagwi tongmani Mwthaknani bagwi, Nangmani Saktharmung Naharjak thung Honwi Haste Police ni DGP ni Thani Kokthun Swikha Khumulwng Press Club.

Aro Sathai Kwlaio Chasal Horo Ganganagar Thana Amchaio Kaisa Govt. Enlisted News Channel ni Driver ni Malkhungo 86 Packet Siddi Kwran Manjakmani Patimungno twiwi Belaino Mwkhang khammani Nangkha Kokthum Bedego Sanmung Khlainai Jotto Koktwma Thumnaireok. Media House ni ID Card Use Khlaiwi eba Malkhungo Press Sticker Thepawi, Sanmung Hamya Khlaijakmani Patimung, Abo Tabuk Waisani Koktwmaya.

Phiya ba Haste Haphangni Nangmani Saktharmung Kwrwi ni bagwi, Mungsa Kebengmung Kwrwikhe Press Sticker Misule Khlaiwi Khlaijagwi tongo Drug Smugglingni Sanmung.

Chasal Horni Patimungno twiwi Press Sticker Misuse wngmani Mwthaknani tei Agartala Press Clubni Bwkhaktwi Kubui Koktwma Thumnaireokni bagwi Press Sticker Issue Khlainani Sanmung Tisawi, Koktisalo Agartala Press Clubni President Pranab Sarkar no Kaisa Koktwma Swikha Khumulwng Press Club.

Khumulwng Press Clubni Koktun Manmani Logilogi no Press Sticker Misuse wngmani Issue no twiwi Kaisa Press Release Khlaiwi Patimungno Sejamani Logilogi Kwrak Saktharmung Naharni Saklaimung Rwkha Agartala Press Club.

Abo haikheno Media House ni ID Card Misuse wngmani Mwthaknani tei Sanmung Hamya bai Gwdaljak Koktwma Thumnai eba Koktwma Thumya Jotto Bororokni Sakao Kerongni Lamatwi Kwrak Saktharmung Naharjaknani Sanmung Tisawi Haste Police ni DGP ni Thani Kaisa Koktun Swikha Khumulwng Press Club.