Chok nungnai rok ni yaphao kwlaijak Tribal rest house  Photo: Unsplash.com Kamalpur bwkhakste-ni mohanpur lama rukung-ni janajati thuthai n...

 Chok nungnai rok ni yaphao kwlaijak Tribal rest house 

Photo: Unsplash.com

Kamalpur bwkhakste-ni mohanpur lama rukung-ni janajati thuthai nok eba tribal rest house chuak nungjaknai thai-se wngwi tongsio. Thanai bisi char swkang Tribal Rest house khulokjak tongma bai kamalpur bwkhakste-no khobwi dhalai hangkor-ni hakchal hakchal lama Chaya thang laisu khaithokya kamini borok rog nogo kiphilwi manya wngkhe rang kisa bai ah nogo tongwi hor lairilai tonglaijamani. Ah nokni naikini khwlainani barja wngkha bwkhakste janajati hamkrai bedek ni. Jora kaisa tangkhor-ni jai kwrwi wngmabai nok hamya wngwi tongmani. Tangkhor abono swnamnabo chaitoklia. Thanai bisisa swkang kahai ajorani haste janajati hamkrai tangkhorni montri Mebar Kumar Jamatia ah thuthai nokno naisonphuru kwtal dalan nok tangwi rina hinwi kok ribumani. Aphuru janajati hamkrai tangkhor kwtal dalan nok swnamna bagwi estimate bo khwlaikha.

Estimate tabuk file burung bwchap tolao kwlaijak. Salbrum brum sanja kwlaikheno phatarni chuwak kephekrog rest house-o phaiwi chuak nwngwi chirik mokorok wnglaio. Kiriwi kebo borogno kebengwi kok saraklaiya.abono twiwi tiprasa khoroksa koksilsawi sakha, sal kolok romwi rest house  haino magwna kwlaiwi tongo. Bwkhakste tei dhalai hangkorni hakchal hakchal phaithokya thangthokya amchaini simi kamalpur-o samung nangwi phaikhe aro  tongwi manya. Aro  sanja kwlaikhe chuwakni panda wngo.

Janajati hamkrai tangkhor-ni barjao tongo DC Aditi Das. Bo abono twiwi sakha, tribal rest house-no kwtal dalan nok swnamna bagwi hasteni janajati kalyan tangkhor 80 lakha rang-ni estimate rihorkha. Tangkhor-ni bwkhaktwi gosimung rihorjak khe 2 tala nok swnamna chengjaganw. Datino fund sokphaiyanw hinwi bo kha thangsamugni kok sakha. 

Tabuk naiwi tongdi janajati thuthai nok-no twiwi tangkhor tamo yapri se. ayang bwkhag jotono mokol kailaijak .