Bukhuk Laisha Debbarma no Chubakha Govt. Degree College, Khumulwng ni swrwngnai rog      Agartala, 20 July [BN]: Bukhuk Lais...
Bukhuk Laisha Debbarma no Chubakha Govt. Degree College, Khumulwng ni swrwngnai rog
     Agartala, 20 July [BN]: Bukhuk Laisha Debbarma no khumulwng rwngnog kotor o swrwng tongnai rog bo chuba phaika. Bukhuk Laisha swngchar o alka chwrai rog haikhe achai phaiphano bo swngchar ni naithok sitwra kunu phano nugui manjaya tangui hwnmale bo achaiphuru ni simino mokol hamya bagwi. Bini mokol Operation khaina o rang puchokya wngmano puchokrwna bagwi chubalai tongo hasteni borokrog. Amohaikheno chubaphaika Khumulwng Rwngnok kotor ni swrwngnai rok. Chubathani phaika Rwngnok kotorni V.P Jitendra Debbarma, G.S Manoj Debbarma, A.G.S Mirja Debbarma kubunni adong akosong.Â
     Chubana phaiphuru bukhuk Laisha ni buma bupha by koklam salaikha borog. Aboni yagulo G.S Manoj sakha, Tripura o aswk borog kwbangma 12 lakh ni sai phano kwbang Tiprasa tongo borok jottono khoksa khoksa rwkheno c 12 Lakh rang kai thangu hwnwi sakha. Aboni bagwi jottono Tiprasa no bwskango phayui chubana nangnai tei chuwak nwngnai rokno bo kok kwcharkha, salsa tongthokyaoi,salsa chuwak chaya nwngya khayui chubakhe teibo chanai sakha G.S. A.G.S Mirja sakha, dati hamwi bukhuk Laisha bo kubunni bwrwi bwsa haikhe buma bupha ni mwkhang-khorang kwchwng khaimana wngthung hwnwi. Bo teibo sakha o chubachu o sini simiya rwngnok kotor o swrwng tongnai rok jottono kisa kisa rwlai chubamani hwnwi. Bo paithakgo kok kwcharkha swrwng tongnai jotto motha no chubakhe belaino chanai hwnwi.
      Phaithakgo V.P Jitendra Debbarma sakha, bono operation khaina twlangthani chubachu ni rang baino hamwi phainani wngthung hwnwi puitu khai o. Borok kok kwcharkha, Chwng chini borogno ahaikhe chubai twidului twlangya k kuchukgo kasai mangulak hwnwi.
No comments