Wanswkmwng kaham bai nw tabok Office-University o Dophani mari-no kwthang narwkthani mokol kaijaknai wngkha kanmung chumung. Nini kanmung ...
 Wanswkmwng kaham bai nw tabok Office-University oÂ
 Jora kaisao warai chakmungni sichingo kwlaiwi Tripuri dophani kanmung chumung kwmana bwkhak thangwi tongmani. Sakni kanmung chumungni swlai buini kanmung chumungse kha phurjaklaisio Tripuri dophani kwbangma bororok . Baithangni mukumu-no kuchugo twlangna tei mwthangwi narwkna bagwi Tripura University-ni Kokborok Bedekni 2nd Semester-ni rwng swrwngnairok tabuk hati barsao salsa Tripuri dophani Kanmung Chumung-bai phainani bagwi yapri naharlaikha. Tripuri dophani jotono mokol kaijaknai wngkha Risha . Hayung berem-o tabuk mung kuchuk ajiui tongo Risha . Phiya jora kaisao Risha-ni borom suda kwmaui thangmani . Tabuk hainohai kwmajak boromno kiphilwi mankha . Khursathai kwlaio, thangnai yaksi haphangni jorao sakni kanmung chumung-no phunukna suda bwkhao phan manya wngwi tongbaimani Tiprasa-rok . Kanmung chumungo suda phiyokmung manya wngwi kha bailaijak tongmani .
 Paithago lukurokni langmao kha swrangmung tubui phaikha thangnai 2018 bisio BJP-IPFT haphang . Tripuri dophani kanmung chumung-no bahaikhe kuchugo twlangnai abono twiwi yapri-bo naharwi tongo tabukni haste haphang . Kha torwi saui mankha ang khoroksa Tripuri dophani borok , Risha ani Tak borok hwnwi . Bisi kolokma romwi Tripuri dophani hukumu mukumuno hakor bisingo huitarwi tonijakmani . Phiya thangnai 2018 bisio Tripuri dophani bagwi kaisa rangchak jora tubui phaikha tabukni haphang . Kok sanani mankha phan, sakni chamungno chanani mankha phiyokmung, rangchak bai baksa naithok kanmung chumungno phunuknani kha torwi mankha Tiprasa-rok . Jotoni swlai kok kotor wngkha, Tripuri dophani kanmung chumungno kuchugo twlangthani Montri Okra Biplab Kumar Deb-ni logisong Niti Deb-ni naharmung .Â
Hasteno karwibo haktorni juda juda thaio Tripuri dophani kanmung chumungbai beraiwi mokol kaijagwi tongo Montri okra-ni logisong Niti Deb . Abohai naharmung bini mung simi bolaijakya , hayung gwnangwi-no Tripuri dophani kanmung chumung lukurokni mokolo tabuk tei kisa juda khe mokol kaijagwi tongo . Abono karwibo Tripuri dophani kanmung chumungbai hasteni joto lukurokni khasuksa Biplab Kumar Deb Montri oKra wngwi swmai tangmani . Abohai mangpili Hasteni Laibumao kwtal phunukmari wngmani . Haste haphangni naharmung kahamni bagwi tabuk twrwk twrwk Tripuri dophani kanmung chumung kuchugo kasaui tongo . Tripuri dophani jotoni swlai mokol kaijaknai tak borok wngkha Risha . o Risha tabuk Tripuri dophani mukumu simiya, hamjakma marini mukumuo swlaijagwi tongo . Haktor yakhe hayung beremni adong okra-rokno hamjakmungni mari yapharthani samungo thepajagwi tongo Risha .Â
Hayung gwnangwi nini kanmung chumungno pirwi manya phano haste haphangni naharmung kahamni bagwi Bwskangni salo Tripuri dophani tak borok kan borok teibo kuchugo kasanai abohaino hojak tongnai lukurokni uansukmung . Rwngnok-rwngnok kotor-rwngyungo simiya nini kanmung chumungno teibo bwskango twlangna hwnkhe nini bwkhao-se achuk khakpwlai rwna nangnai dophani hukumu mukumu-no . Abohai wngkheno dophani mung chwngsanai . Tangwi hwnkhe nini kanmung chumungno wngkha dophani sinimung .
No comments