Khailangkha swrapsani bisingw Development EX-CM Biplab Kumar Deb Biplab Deb-ni naikolmung bai Tripura-no modi hapang bini chukmungno phunu...
Khailangkha swrapsani bisingw Development EX-CM Biplab Kumar Deb
Biplab Deb-ni naikolmung bai Tripura-no modi hapang bini chukmungno phunuk-kha. Hasteni hamkraini logi logi, biplab kumar deb rwng srwngmung – hukumuno phuarmung tei hodani jwngjalrogno sokomolnani chaitok-kha thanai bisi brwi romwi. Abo wngwi mankha north-east india-ni BJP-ni khoroksa Fire Brand Leader. Abohaino kha khwlailaikha wansuk krwngrog.
Tripura-ni kwcham montri okra biplab kumar deb bjp central committee-ni mokol kaijakthotok kokchapmung naharma yagulo achukthai yakarwi rikha. Bini achukthaio achukha kwtal montri okra Dr. Manik Saha. tamoni bagwi ebakhe tamo khwlaina bagwi central-ni twiphangrog abotwi khwlaikha abono twiwi mungsa sraisa kokthum krwi. Biplab deb-ni twidulmungno bodolni bisingo kha pengya, tei bini samungno bjp central twiphangrog chajaklia hinwi salaiwi tongo baksa social mediarogo. Phiyaba abo kok arang nangya. Tamoni hinmale, biplab deb-ni twidulmung bai thanai bisi brwiyo Tripura o kwmang singsa hamkrai wngkha. Ah kok Tripura hasteo simiya, sajagwi tongkha phatar hasteni social media rogobo. Biplab deb phainai bisi nwichiba bisi-o Tripura hasteno khurumpui rangthong swnamna bagwi kaisa road map-bo swnamkha. Abono khwlaina bagwi samungbo chengjakkha.
Bini 'সুবর্ণ জয়ন্তী ত্রিপুরা নির্মাণ যোজনা'-ni bisingo hamkraini bagwi one thousand crore rang swbaina bagwi samung bwtangbo naharjakkha.
Tripura o new Zealand (নিউজিল্যান্ড) technology rwgwi khwlaijak housing project mithingjaganw oh bisini December talo. Hapangni abotwi kuchung naharmung samung bwtang bai manwi manai krwi borokrog dak kom bai flat. Abono karwibo biplab deb-ni chaitokmung bai Tripura swnamjaknai tei kaisa birkhung khola. Tripurani bolong halong tei tongkhor naithothok beraikhiri thai swnamwi mano. Abono karwibo tripurao thoongtharni hapar koboljak. Puran tei mohabarat-o ah kokrokno khursajak tongo. Kai bachisa sokti pitni bisingo Tripureswari mwtai nok kaisa. Phiyaba tripurao phatar hani borokrog phaina bagwi trai-ni thang laisu wngthayakhu. Aboni bagwi biplab kumar deb-ni hapang traini thang phai bwkhak mokol kaichomwi nakha.Datino Tripura assam lumding bai double train lama tei multi module transport hub mannani thangwi tongo. Train-ni thang laisu hasteni rangthong hamrina bagwi doro. Aboni bagwi Tripura no bangladesh bai bania-ni halok doti dodoro swnamwi tongo. Central tei haste hapang abono twiwi khwthawi samung tangwi tongo.
Ajimung bangrina bagwi biplab deb hapang 'ত্রিপুরা ইন্ডাস্ট্রিয়াল ইনভেস্টমেন্ট প্রমোশন ইনসেনটিভ স্কিম' chengwi rikha. Omorog jotono Biplab-ni jorao mankha haste. Aboni logi tumung biplab deb hapang naikolma jora kaisa kotor manmung mankha ah kok sana thangkhe sawi mano, abo wngkha kerong raida kaham tonimani. Sal kolok romwi yaksi hapang thwngrwng rwgwi bwthar- tongthar khwlaimani bangla tei keralano mechenwi rikha. Phiyaba biplab deb-ni hapang thwngrwng rwgwi bwthar tokthar khwlaima mwthagwi rikha.
Yaksi hapangni jora Tripurao montrirog bai bwlaikkhe corruption khwlaijakkha. Phiyaba biplab deb-ni hapang thanai bisi brwini bisingo khoroksa ebakhe kaisabo corruption-ni koksilsamung manyakhu. Biplab deb-nin hapang central tei haste kainwi hapangno Tripura banglirogni hukumu mukumuno kwtal role model swnamna bagwi chaitokmung nakha. Aboni logi logi janajatirogni bagwibo kwbangma sak tharmung tharkha biplab kumar deb. Thanai hapangni abotwi mungsa yapri krwi. Phiyaba Biplab Deb-ni naikolmung bai Tripura-no modi hapang bini chukmungno phunuk-kha. Hasteni hamkraini logi logi, biplab kumar deb rwng srwngmung – hukumuno phuarmung tei hodani jwngjalrogno sokomolnani chaitok-kha thanai bisi brwi romwi. Abo wngwi mankha north-east india-ni BJP-ni khoroksa Fire Brand Leader. Abohaino kha khwlailaikha wansuk krwngrog.
No comments