Bihar ni sok phaikha bycycle bai Tripura o Bharat haktor-no sina tei haktorni joto hasteni lukurokni tomung chamung -rokno mokol baithang na...
Bihar ni sok phaikha bycycle bai Tripura o
Bharat haktor-no sina tei haktorni joto hasteni lukurokni tomung chamung -rokno mokol baithang naiwi sinani bagwi baithangni By Cycle-bai nongkhormani Biharni khoroksa rwng kwrwng sikla . tabuk yapri rwphaikha hasteni Teliamurao .
Bihar hasteni Diraj Kumar. Khoroksa rwng kuchuk swrwngjak sikla sebuk khwlaiwi tongmani. Phiya Bharat haktorno saimansukna tei naina bagwi thangnai nokha taldok swkang Bihar hasteni simi baithagni By Cycle-bai lam rwmani . Bharat-ni joto hasteo guriui naina bagwi sebuk yakarwi nongkhormani . twrwk twrwk Mizoram, Sikkim, Punjab-no khobwi kaichitham haste guriui naikha By Cycle-bai . tabuk Tripura hasteo yapri berakha Diraj .Â
Phasal-ni diporo jatio lahar-twi Teliamura wngwi Agartala bwkhak lam rwkha bo . tamni bagwi bini o beraimung hwnwi swngjakhe Diraj Kumar sakha, bororokno sinina, bororok-bai kok sana, bororokni tomung chamungno sina-no khobwi podrepot siyano sina bagwino by cycle-bai Bharatni juda juda hsteo guriui tongo . bo khoroksa M.Phil  khwlaiwi tongmani , abobai baksa sebuk-bo khwlaiwi tongmani .
Sebuk khwlaiwi tongphuru kaisa seminar-o manjakphuru bini thani kaisa uansukmung phaimani swkang Bharat-no sinani nango, sinina nangnai bororokno, kok sana nangnai borogbai . bahaikhe tong bororok aborokno sinani nangnai. O kokrokno uansugwino nokni nongkhormani Diraj Kumar . abohaikhe tabuk haktorni kaichitham haste berai naimani bisingo jotoni swlai chajaksukma haste wngkha salka babai hasteni Mizoram . aboni ulo Sikkim tei Punjab . Tripura hasteni Agartala beraimani ulo bo By Cycle-bai thangnai Meghalaya-ni Shillong-o .Â
Joto hasteo guriui naimani bebak kokthum diary-o tisaui tongo Diraj . bini abohai uansukmung bini langmao phunuknai kwtal lama tei lukurokni thani kha bacharwnai , abohaino uansukmung lukurokni.
No comments