Kwtal Sevak sakhlaimwng Tripura hasteo Haste Montrisabhani bwkhaktwi Naharjakha kotor yapri . Rwng bedek tei sakham-nukhung hamkrai bedek-...
Kwtal Sevak sakhlaimwng Tripura hasteo
Haste Montrisabhani bwkhaktwi Naharjakha kotor yapri . Rwng bedek tei sakham-nukhung hamkrai bedek-o supungjaganw kwbangma achukthai. Phasalo Montri sabhani Koklam pandao Uansukmung Naharjakmano Koktwma thumnairokni pandao o kokrokno sakha kokthum hukumu Bedekni Montri Sushanta Chowdhury. Hasteo nangmaswk PGT kwrwini bagwi jwngjal nukjagwi tongo . abono naharwino rwngnok bedek-o twlanjaganw 300 Post Graduate Teacher. Aboni bisingo Sociology-75, Psychology 75 ,Geography- 75,Economics -75 achukthai supungjaganw . swkangno abono twiwi post create khwlaijak tongmani. Bwskangni salo daktino o achukthai amjokmungni bisingtwi achukthai supungjaganw hwnwi sakha Montri . abono karwibo alaida khe 64 PGT tei 175 graduate teacher twlangnani bagwi Montri sabhao uansukmung naharjakma kokrokno koktwma thumnairokni pandao sakha kokthum hukumu bedekni montri Sushanta Chwodhury.
Koktwma thumnairokni pandao Montri sakha, thangnai Covid-ni jorao jotoni swlai samung kaham tangkha Lab Technician . bwskangni salo hasteni sakhamni samung humungno teibo charwi tisane bagwi tei Lab Technician-ni achukthai teibo bangrwna bagwi 143 lab Technician achukthai supungnani uansukmung naharkha haste Montri sabha. Amjokmungni bisingtwi tei sebuk-ni joto raidano rwksauino o achukthai supungjaganw hwnwi sakha Kokthum bedekni montri.
Montri sabhani koklam pandao gosimung rwjakha swkango 348 Special Educator post Create khwlaina bagwi Proposal rwjakmano . Special Educator-ni samung wngkha rwngnogo kwbangma khora kompa eba sak kebel tongnairokno phwrwngnani . bwskangni salo 348 Special Educator achukthai supungna bagwibo montri sabha gosimung rwkha . koktwma thumnairokni pandao o kokthum rwkha montri Sushanta Chowdhury.
A salo hasteni siklarokni bagwibo koktwma kaham tubukha haste montri sabha. Siklarokni bisingo Start up-ni bisingtwi ajimungni lama swnamna bagwi uansukmung kotor naharjakha. Start Up-ni bisingtwi tamo samung khwlaina muchung aboni bagwi haste haphangno rwna nangnai DPR swnamwi. Abono cherwi naima ulono rwjaknai Interest kwrwi loan. Koktwma thumnairokni pandao sakha montri Sushanta Chowdhury
Kebengnairokni khorang-o twi lukhulaiwi naharjakha Montri sabhani bwkhaktwi uansukmung kotor. Abohaino rwng thwngno twiwi uansuk kwrwngrokni uansukmung .
No comments